Spænska knattspyrnusambandið hefur rekið landsliðsþjálfarann Julen Lopetegui úr starfi. Þessi tíðindi koma mörgum í opna skjöldu enda eru aðeins tveir dagar í að Spánverjar spila sinn fyrsta leik á heimsmeistaramótinu í knattspyrnu.
Frá þessu greinir Sky Sports.
Í gær vakti athygli þegar greint var frá því að Lopetegui myndi taka við Real Madrid að móti loknu. Hann hefði samþykkt þriggja ára samning við spænska stórveldið og myndi taka við starfinu af Zinedine Zidane. Á blaðamannafundi í morgun var tilkynnt að Lopetegui myndi ekki stýra Spánverjum á mótinu í Rússlandi.
Spánverjar eru af mörgum taldir sigurstranglegir á mótinu og spurning hvaða áhrif þessi ákvörðun spænska knattspyrnusambandsins hefur á liðið. Spánverjar eru í B-riðli með Portúgal, Marokkó og Íran. Þeir mæta Portúgal í stórleik riðilsins á föstudag.
Guillem Balague, sérfræðingur um spænska boltann, segir við Sky Sports að leikmenn spænska liðsins, þar á meðal fyrirliðinn Sergio Ramos, hafi gert allt til að Lopetegui yrði ekki rekinn en án árangurs. Fór það mjög illa í forsvarsmenn spænska knattspyrnusambandsins að Lopetegui hefði samið við Real Madrid án þess að upplýsa sambandið um gang mála.
