Hörður Snævar Jónsson skrifar frá Rússlandi:
,,Það hefur komið mér á óvart hversu rólegir við erum búnir að vera,“ sagði Gylfi Þór Sigurðsson leikmaður íslenska landsliðsins fyrir æfingu liðsins í Rússlandi í dag.
Íslenska liðið er að æfa í þriðja sinn í dag en nú er farið að styttast í fyrsta leik á HM, liðið hefur leik á laugardaginn gegn Argentínu.
Meira:
Ítarlegt viðtal við Gylfa í Rússlandi – ,,Ég hélt að það yrði meiri spenna og æsingur í okkur“
Íslenska liðið hefur talsverðan frítíma og er hann nýttur í margt, leikmenn skella sér bæði í borðtennis og pílu.
Jóhann Berg Guðmundsson lék Gylfa grátt á fyrsta degi í borðtennis en Gylfa tókst að ná fram hefndum í gær.
,,Ég tapaði tvisvar í borðtennis, við fórum í pílu í gær og ég rúllaði Jóa upp þar. Það er 1-1 í leikjum,“ sagði Gylfi um málið.