Það hefur gengið erfiðlega fyrir Kolbein Sigþórsson, framherja Nantes að losa sig burt frá félaginu.

Waldemar Kita forseti félagsins hefur staðið í deilum við íslenska framherjann, hvernig og hvort hann fari frá félaginu nú í janúar.

Kita og Nantes hafa ekki neinn áhuga á að nota Kolbein, sama þó að heilsa hans sé góð og hann geti hjálpað liðinu innan vallar.

Kolbeinn vill komast burt frá Nantes en samkvæmt foresetanum vill hann fá samning sinn greiddan út, ef hann á að fara.

Samningur Kolbeins er til ársins 2020 og Kita hefur ekki áhuga á að borga hann út.

,,Þetta gengur erfiðlega, við höfum reynt að finna grundvöll fyrir samkomulagi en Kolbeinn vill samning sinn greiddan að fullu og það gengur aldrei upp,“ er haft eftir Kita í frönskum miðlum.

Kolbeinn kom til Nantes árið 2015 og gerði þá fimm ára samning við franska félagið en meiðsli hafa sett stórt strik í dvöl hans hjá félaginu.

Kolbeinn lék með íslenska landsliðinu í haust en vonast er til að framherjinn knái komist á flug á nýjan leik, það myndi hjálpa landsliðinu mikið.