Íslenska karlalandsliðið gerði jafntefli við Gana í kvöld en liðin áttust við á Laugardalsvelli í æfingaleik.

Þeir Kári Árnason og Alfreð Finnbogason skoruðu mörk Íslands í 2-2 jafntefli en bæði mörkin komu í fyrri hálfleik.

Gana kom gríðarlega sterkt til leiks í síðari hálfleik og skoraði liðið tvö mörk og 2-2 jafntefli niðurstaðan.

Íslenska liðið hefur fengið á sig 11 mörk í þessum fjórum æfingaleikjum fyrir HM. Hefur Heimir áhyggjur?

,,Ég ætla ekki að segja að ég sé rólegur, í fimm síðustu leikjunnum í undankeppni HM fengum við eitt mark á okkur. Gegn mjög sterkum þjóðum,“ sagði Heimir Hallgrímsson.

,,Við vitum alveg að okkar bestu leikir eru þegar við erum sterk liðsheild, þá er erfitt að skora gegn okkur. Við erum að rótera mikið í liðinu, margir nýir leikmenn að spila. Við erum að spila gegn sterkum þjóðum í þessum leikjum, gegn Perú, Mexíkó, Noregi og Gana. Mjög sterkar þjóðir.“

,,Ef við erum ekki rétt stilltir þá getur þetta gerst. Það verður vinna fram að leiknum við Argentínu að stilla þetta og að allir verði 100 prósent.“