Aron Einar Gunnarsson, fyrirliði Íslands skrifar áhugaverðan pistil á Theplayerstribune í dag.
Aron skrifar þar um feril sinn og upphaf hans í atvinnumennsku, Aron Einar fór 17 ára gamall til Hollands.
Það reyndist Aroni afar erfiður tími að flytja einn út í hinn harða heim atvinnumennskunnar og voru mörg tár sem féllu.
,,Ég vissi að ég yrði að fara frá Íslandi til að bæta mig sem leikmaður, þegar ég fékk tækifæri ti að fara til AZ Alkmaar í Hollandi þá tók ég það. Ég var 17 ára gamall, það var erfiður tími. Fótboltinn var á allt öðru stigi, ég var klobbaður fjórum sinnum á fyrstu æfingu. Ég skammaðist mín og íhugaði að taka fyrsta flug aftur heim,“ skrifar Aron sem mun leiða Ísland á HM í Rússlandi.
,,Það erfiðasta var að fara frá fjölskyldu minni, ég var fyrstu tvo mánuðina á hótelinu að hringja grátandi í mömmu og segja að ég vildi ekki vera þarna. Sem betur taldi fjölskyldan mín mér trú um halda áfram og innst inni vildi ég það.“
Allt það erfiða skilaði sér í gleði því Aron Einar var ungur kallaður inn í íslenska landsliðið og segir frá því.
,,Öll þessi tár skiluðu sínu, 18 mánuðum síðar var ég kallaður inn í íslenska landsliðið. Það var vináttuleikur gegn Hvíta-Rússlandi á Möltu. ég varð að koma mér í flug í hvelli, ég átti ekki bíl. Ég hafði verið á hjóli fyrsta árið, ég hafði ekki efni á öðru.“
,,Vitið hvað mamma gerði þá? Hún gaf mér vespu, rauða vespu. Þetta var eins og mótorhjól, mér fannst það svalt. Ég varð háður henni, þegar ég var kallaður í landsliðið þá skellti ég töskunni á bakið og fór á vespunni á lestarstöðina til að koma mér út á flugvöll.“
