Íslendingar mæta Portúgölum í fyrsta leik liðsins á Heimsmeistaramótinu í handknattleik þann 12. janúar næstkomandi. Óhætt er að fullyrða að mikillar eftirvæntingar gæti hjá þjóðinni enda er valinn maður í hverju rúmi íslenska liðsins. Án þess að draga leikmenn liðsins í dilka er Ómar Ingi Magnússon, nýkrýndur íþróttamaður Íslands í annað sinn í röð, lykilmaður.
Datahandball greindi frá því í vikunni að Ómar Ingi hafi verið langmarkahæsti leikmaður Evrópu árið 2022. Kappinn skoraði 460 mörk í keppnisleikjum á seinasta ári. Frá þessu greindu íslenskir fjölmiðlar í þaula.
Minna hefur farið fyrir þeirri staðreynd að í liði Portúgal eru tveir af efnilegustu leikmönnum heims um þessar mundir. Það eru bræðurnir Francisco (eða Kiko) og Martim Costa. Yngri bróðirinn, Kiko, þykir ívið betri en hann er aðeins 17 ára gamall og á leið á sitt fyrsta stórmót fyrir A-landslið þjóðar sinnar.
Það er einmitt Kiko Costa sem skipar annað sætið á listanum yfir markahæstu leikmenn Evrópu í fyrra, á eftir Ómari Inga. Þrátt fyrir ungan aldur skoraði Kiko, sem leikur fyrir Sporting í heimalandinu, 359 mörk á nýliðnu ári. Hann leikur sömu stöðu á vellinum og Ómar Ingi og gæti – ef hann stenst þá pressu sem fylgir því að spila í fyrsta sinn á HM – orðið Íslandi erfiður ljár í þúfu næstkomandi fimmtudag og sennilega um ókomin ár.
Ýmislegt bendir til þess að Kiko muni standast pressuna. Sporting mætti Ómari Inga og félögum í Magdeburg í Evrópudeildinni síðastliðið vor en Magdeburg varð um það leyti Þýskalandsmeistari. Kiko skoraði í tveimur hnífjöfnum viðureignum við besta lið Þýskalands 18 mörk í 22 skotum. Martim var litlu síðri og skoraði 15 mörk. Bræðurnir létu einnig að sér kveða í æfingaleik gegn Noregi á miðvikudag og skoruðu þrjú mörk hvor. Þetta eru leikmenn sem hæglega gætu stolið senunni á HM.
Guðmundur Guðmundsson landsliðsþjálfari hefur, eins og hans er von og vísa, verið með böggum hildar yfir andstæðingum Íslands og haldið því sjónarmiði ákaft á lofti að það verkefni að komast upp úr riðlinum í góðri stöðu verði ærið.
Guðmundur, sem hefur marga fjöruna sopið, hefur það til síns máls að Portúgal hefur reynst Íslandi hættulegur andstæðingur undanfarin ár. Ísland vann þó leik liðanna á EM í fyrra og hefur alla burði til að endurtaka þann leik.
