Málefni Knattspyrnusambands Íslands hafa verið í brennidepli síðustu daga og vikur. Formaðurinn og stjórn sambandsins sagði starfi sínu lausu vegna ásakanna um að sambandið tæki ekki á ábendingum um meint brot landsliðsmanna og að hylmt væri yfir slíkum málum.

Klara Bjartmarz framkvæmdar stjóri KSÍ hefur hins vegar ekki viljað axla sömu ábyrgð og aðrir og sagði starfi sínu ekki lausu.

Mikill þrýstingur var settur á Klöru að axla ábyrgð en að lokum fór hún í leyfi frá störfum. Ekki hefur komið fram hversu langt leyfi Klöru verður, það er ótímabundið.

Stjórn KSÍ hefur boðað til aukaþings í byrjun október þar sem ný stjórn til bráðabirgða tekur við. Sú stjórn mun sitja fram í febrúar þegar ársþing sambandsins fer fram, þá verður kosið um nýjan formann og nýja stjórn.

Til umræðu hefur verið að bráðabirgðarstjórnin myndi víkja Klöru úr starfi ef hún ákveður ekki sjálf að stíga til hliðar. Samkvæmt heimildum DV getur sú stjórn hins vegar ekki rekið fólk úr starfi, fyrir því hefur hún ekki heimild.

Klara verður því í starfi fram á næsta ár hið minnsta ef hún ákveður ekki sjálf að stíga til hliðar. Það væri þá undir nýrri stjórn komið hvort hún bæri traust til Klöru til að vinna áfram fyrir sambandið en Klara hefur starfað hjá KSÍ í 27 ár.

Ákveði stjórnin sem tekur við í febrúar að víkja Klöru úr starfi er hún með langan uppsagnarfrest og hefur verið talað um 12 mánuði í því sambandi. Klara þénar um 1,3 milljón í laun á mánuði samkvæmt tekjublaði DV frá því í ágúst.