Athyglisvert var að fylgjast með viðbrögðum Pírata og Viðreisnarfólks eftir borgarstjórnarkosningarnar. Píratar segja mikilvægt að hlusta eftir vilja kjósenda sem birtist í kosningaúrslitunum, en lýsa svo yfir vilja til að halda meirihlutanum áfram undir forystu Dags B. Eggertssonar, þótt hann hafi beðið stóran persónulegan ósigur.

Út frá sjónarhóli lýðræðisins þarf ekki að rýna lengi í úrslit næturinnar til að komast að þeirri niðurstöðu að kjósendur séu beinlínis að frábiðja sér áframhaldandi forystu Dags B. Eggertssonar í borginni. Og þeir voru heldur ekki að óska eftir þátttöku Vinstri grænna í nýjum meirihluta. Báðir þessir flokkar, Samfylking og Vinstri græn, töpuðu miklu fylgi frá fyrri kosningum og meirihlutinn féll.

Þess vegna hlýtur að vera aðkallandi spurning fyrir fólk eins og Pawel Bartozek, nýjan borgarfulltrúa Viðreisnar, sem er töluglöggur með afbrigðum, hvort það sé hlutverk Viðreisnar að bæta í meirihluta sem fólk var að hafna?

Ef Viðreisn gerir það, og tryggir Samfylkingunni með því áframhaldandi völd í Reykjavík án þess að hafa unnið til þess í kosningum, gæti það orðið banabiti flokksins. Allir þekkja hvernig fór fyrir Bjartri framtíð.

Pawel og aðrir nýir borgarfulltrúar þurfa að tryggja, að það sannist ekki nú í eitt skipti fyrir öll, að það sé alveg sama hvað borgarbúar kjósi, þeir sitji alltaf uppi með Dag B. Eggertsson sem borgarstjóra.