Starfsmaðurinn sem um ræðir heitir TJ Sabula og er kvæntur tveggja barna faðir. Trump heimsótti verksmiðjuna á dögunum og sá Sabula sér leik á borði þegar Trump gekk fram hjá honum og kallaði að honum ókvæðisorð í tengslum við mál Jeffrey Epstein. „Verndari barnaníðinga,“ sagði Sabula úr um 20 metra fjarlægð frá forsetanum.
Sabula hefur nú verið sendur í leyfi meðan á rannsókn stendur og á hann á hættu að missa starf sitt í verksmiðjunni. Í viðtali við Washington Post kvaðst Sabula ekki sjá eftir gjörðum sínum en hann sagðist þó vissulega hafa áhyggjur af framtíð sinni ef hann missir vinnuna.
Söfnun var hrundið af stað á vefnum GoFundMe fyrir Sabula og er óhætt að segja að hún hafi gengið vel. Nú þegar hafa 480 þúsund dollarar, rúmar 60 milljónir króna, safnast fyrir kappann og ætti hann því ekki að þurfa að hafa áhyggjur af fjármálum sínum í bráð – hvað sem síðar verður.
Í frétt The Guardian kemur fram að stéttarfélag Sabula, UAW, hafi stutt við bak hans.
„Hann trúir á tjáningarfrelsi, sem er meginregla sem við styðjum heilshugar, og við stöndum með félagsmönnum okkar í að vernda rödd þeirra á vinnustaðnum,“ segir hún.
