Tyrknesk kona telur sig líkjast mjög Donald Trump Bandaríkjaforseta og hefur höfðað mál þar sem hún segir Trump líffræðilegan föður sinn og krefst hún DNA-faðernisviðurkenningar til að sanna kröfu sína.

Konan, Necla Ozmen, 55 ára, er búsett í Ankara höfuðborg Tyrklands. Hún lagði kröfuna fram í fjölskyldudómi þar í borg í september síðastliðnum, kröfu hennar var hafnað, en Ozmen hefur áfrýjað.

Hún segist fædd árið 1970 og er skráð í opinberum gögnum sem dóttir hjónana Sati og Dursun Ozmen, sem ólu hana upp. Ozmen segist síðar hafa komist að því að hún væri ættleidd og ættleidd móðir hennar, Sati, sagt henni sannleikann árið 2017. Segir Ozmen að skipt hafi verið á börnum á spítala í Tyrklandi í kringum 1970, líklega í Ankara.

Hún segir Sati hafa fætt andvana barn á spítalanum og önnur móðir, sem fæddi barn þar á sama tíma, bandarískur ríkisborgari sem Ozmen kallar Sophia, hafi afhent Sati sitt barn til að vera alið upp og skráð sem barn Ozmen hjónanna.

Ozmen heldur því fram að Sophia hafi sagt ástæðuna fyrir að hún vildi gefa barn sitt frá sér vera að barnið væri ávöxtur forboðins sambands við Trump. Í viðtali við tyrkneska fjölmiðla segist Ozmen aðeins geta giskað á hvernig Trump og Sophia hafi kynnst. Hún segir Sophiu hafa sýnt Sati mynd af Trump þegar barnaskiptin fóru fram og gefið upplýsingar um föðurinn.

Ozmen segist vilja ræða málið við Trump. Ég vil ekkert koma honum í vandræði. Ég vil bara vita sannleikann. „Ég vil bara vita hvort hann er faðir minn. Ég myndi vilja tala við hann. Ég get sannað að hann er faðir minn með DNA-faðernisprófi, ef hann samþykkir það. Ég held að hann sé góður faðir. Ég held líka að hann myndi ekki snúa baki við mér.“

Dómstóllinn vísaði kröfu Ozmen frá vegna skorts á sönnunargögnum. Hún er þó hvergi bangin og hefur áfrýjað og hefur einnig sent kröfu sína til bandaríska sendiráðsins í Tyrklandi og til dómstóls í Bandaríkjunum.