Nýsjálensk kona var rekin úr flugvél og ákærð fyrir að hafa dansað ölvuð í ganginum þegar farþegar voru að ganga um borð. Atvikið átti sér stað í júlí um borð í flugvél Qantas frá Sydney til Queenstown, að því er news.com.au greindi frá.

Sheree Young, fimmtug, komst í mikið stuð fyrir flugtak. Lögreglan heldur því fram að Young, sem mun hafa verið ölvuð, hafi hunsað fyrirmæli flugþjóna, blótað ​​starfsfólki og haldið áfram að dilla sér í ganginum.

Athæfi hennar varð til þess að flugmaðurinn hætti við flugtak, sneri aftur að hliðinu og kallaði á áströlsku alríkislögregluna (AFP) til að fjarlægja Young úr vélinni. Þegar lögreglan kom á staðinn var Young ekki sátt, reifst og streittist á móti, en loksins tókst að fylgja henni út úr flugvélinni. Eftir að vélin komst loks í loftið var Young látin laus og send heim til Nýja-Sjálands daginn eftir.

Young mætti ​​fyrir dóm á miðvikudag eftir að hafa verið ákærð fyrir að hafa ekki farið eftir öryggisleiðbeiningum áhafnarmeðlima, sem hefur í för með sér hámarkssekt upp á yfir 10.500 dali. Young var einnig ákærð fyrir að hindra og veita mótspyrnu gegn opinberum starfsmanni, sem hefur í för með sér hámarksrefsingu allt að tveggja ára fangelsi ef hún er fundin sek.

Þessar ákærur kunna að hljóma öfgakenndar, en Trevor Robinson, rannsóknarlögreglumaður hjá AFP, hélt því fram að hegðun Young hefði haft hættu í för með sér.

„Meint hegðun þessarar konu setti öryggi hennar, farþega og áhafnar í hættu og olli í þessu tilfelli seinkun á flugtaki, sem veldur öllum um borð óþægindum,“ lýsti hann yfir. „Hver ​​sem hegðar sér illa undir áhrifum áfengis verður vísað úr flugi sínu.“