Kvikmynd James Cameron, Titanic, var ein stærsta mynd ársins 1997 og eins og kvikmyndaáhugamenn vita fóru Kate Winslet og Leonardo DiCaprio með aðalhlutverkin.

Bandaríski leikarinn Matthew McConaughey var þó næstum búinn að landa aðalhlutverkinu, en hann mætti í áheyrnarprufur hjá Cameron.

Í bók Jon Landau, framleiðanda myndarinnar, The Bigger Picture, sem kemur út 4. nóvember næstkomandi, segir Landau frá áheyrnarprufunni. Landau lést 5. Júlí 2024, en lokafrágangur á bókinni var gerð eftir andlát hans.

„Við fengum Matthew til að gera atriði með Kate. Maður vill kanna kemestríuna á milli fólks, ekki bara hvernig fólk lítur út á upptöku heldur hvernig það hefur samskipti,“ skrifar Landau í endurminningum sínum.

„Kate var heilluð af Matthew, nærveru hans og sjarma. Matthew lék senuna með drungalegum rómi.“

Þegar McConaughey talaði með suðrænum hreim, sagði Cameron við hann: „Þetta er frábært,“ en bætti við: „Nú skulum við prófa þetta á annan hátt.“

Landau heldur því fram að McConaughey hafi sagt við Cameron þegar hann bað hann að breyta hreimnum: „Nei. Þetta var nokkuð gott. Takk,“ sem kostaði hann hlutverkið.

DiCaprio var líka með vesen, en Camereon sagði frá því í viðtali við GQ árið 2022 að þegar hann bað DiCaprio, um að lesa handritið í óvæntri prufutöku, hefði DiCaprio svarað: „Ó, ég fer ekki í prufur.“

Þegar Cameron lét hann hins vegar vita að ef hann tæki ekki prufu, þá fengi hann ekki hlutverkið, samþykkti DiCaprio treglega að fara í gegnum nokkrar línur og sló í gegn í áheyrnarprufunni.

„Kate varð yfir sig heilluð og ég hugsaði með mér: „Allt í lagi, hann er gaurinn.““