Breski milljarðamæringurinn Mike Lynch, sem auðgaðist í tæknigeiranum, hafði boðið vinum og fjölskyldu sinni í frí á snekkjunni, Bayesian sem er 56 metra löng, í ágúst á síðasta ári. Hann hafði nýlega verið sýknaður í stóru fjársvikamáli sem hafði hangið yfir höfði hans í rúmlega tíu ár. Þessu átti að fagna með glæsibrag en þess í stað endaði veislan sem martröð.
Mjög heitt var í Miðjarðarhafinu dögum saman og veðurviðvörun var gefin út fyrir 19. ágúst, mjög slæmu veðri var spáð.
Skipstjórinn, sem hafði 11 manna áhöfn sér til aðstoðar, ákvað því að kasta akkerum tæplega 500 metrum undan strönd hafnarbæjarins Porticello kvöldið áður en óveðrið átti að skella á.
Samkvæmt skýrslu bresku slysarannsóknarnefndarinnar fór skipstjórinn í rúmið og bað háseta um að vekja sig ef snekkjuna færi að reka eða ef vindurinn færi yfir 20 hnúta.
Snekkjan fór að halla um nóttina og hásetinn hélt að hún væri farin að reka og vakti því skipstjórann um klukkan 4. Hann reyndi strax að ræsa vélina og stýra snekkjunni upp í vindinn en það var um seinan.
Áður en vélin komst almennilega í gang, var vindurinn kominn upp í 70 hnúta og klukkan 04.06 rak snekkjuna 90 gráður á stjórnborða á nokkrum sekúndum. Fólk, húsgögn og lausir munir flugu um allt og það slökknaði á ljósavélunum.
Eftir það voru aðeins ljós á batterísknúnum neyðarljósum. Fólk kastaðist til í myrkrinu á meðan það reyndi að komast upp frá lægri hlutum snekkjunnar. Háseti féll fyrir borð. Skömmu síðar byrjaði sjór að streyma inn stjórnborðsmegin og á nokkrum sekúndum fyllti hann stigana niður á tvær neðstu hæðirnar.
Klukkan 04.17 sökk snekkjan.
Þeir farþegar og áhafnarmeðlimir, sem komust út úr snekkjunni, ríghéldu í brak á yfirborði sjávar áður þeir komust í björgunarbát. Fiskibátur kom síðar að björgunarbátnum og bjargaði fólkinu.
Af 12 áhafnarmeðlimum og 10 farþegum, komust 15 lífs af. Mike Lynch og átján ára dóttir hans, viðskiptafélagar hans, þeir Jonathan Bloomer og Christopher Morvillo, og eiginkonur þeirra og kokkur snekkjunnar fórust öll.
Skammt frá Bayesian lá miklu minni bátur, Sir Robert Baden Powell, sem komst óskaddaður í gegnum óveðrið því skipstjóranum tókst að ræsa vél hans tímanlega.
Mismunandi útskýringar
Gríðarlegar bótaupphæðir geta verið í spilinu varðandi málið en upphæð þeirra byggist á hver verður dreginn til ábyrgðar fyrir slysið.
En niðurstöður bresku og ítölsku rannsóknarinnar eru mjög ólíkar. Bretarnir komust að þeirri niðurstöðu að um óhapp hafi verið að ræða og að ábyrgðin liggi hjá fyrirtækinu Perini Navi sem hannaði og smíðaði skútuna sem var með heimsins hæsta álmastur. Bretarnir segja að skútan hafi verið með margar „veika punkta“ þegar hún sigldi fyrir vélarafli í miklum vindi.
Ítölsk yfirvöld hafa allt aðra sýn á málið og áður en búið var að ná síðasta líkinu úr skútunni, byrjuðu ítalskir saksóknarar að rannsaka málið sem hugsanlegt manndráp.
En báðar rannsóknirnar eru enn í gangi og nú beinast þær að skipstjóranum og tveimur áhafnarmeðlimum sem eru grunaðir um að hafa brugðist rangt við í þeim aðstæðum sem upp komu og hafi þar með átt hlut að máli varðandi dauða sjö manns.
Þrjár dularfullar tilviljanir
Málið er hlaðið ótrúlegum og dularfullum smáatriðum en þrjú atriði, sem engin svör hafa fengist við, standa upp úr og hafa vakið mikla athygli fjölmiðla, rannsakenda og fólks sem hneigist til samsæriskenninga.
Það fyrsta er fjársvikamálið sem hékk yfir höfði Mike Lynche árum saman. Málið snýst um söluna á Autonomy, sem var talið vera eitt besta breska tæknifyrirtæki sögunnar. Málið hefði getað kostað Lynch 11 milljarða dollar og allt að 20 ára fangelsi í Bandaríkjunum en eins og áður sagði var hann sýknaður skömmu áður en snekkjan sökk.
Tveimur dögum eftir slysið, sögðu fjölmiðlar frá nýju andláti víðs fjarri slysstaðnum. Stephen Chamberlain, fyrrum aðstoðarforstjóri Lynch, var ekinn niður þegar hann var úti að hlaupa á Englandi. Hann lést af völdum áverka sinna.
Mánuði eftir að snekkjan sökk, skýrðu rannsakendur frá því að vatnsþéttur peningaskápur, sem innihélt ofurkóðaða harða diska með leynilegum upplýsingu, væri í snekkjunni sem lá á 50 metra dýpi. Af þessum sökum var vakt höfð við skipið af ótta við að Rússar eða Kínverjar myndu reyna að komast að því til að ná diskunum.
Síðan þá hefur ekki heyrst meira um vatnsþétta peningaskápinn.
Bayesian var nýlega hífð upp af sjávarbotni og stendur nú við höfnina í Termini Imerese á Sikiley.
La Repubblica hefur eftir rannsakendum að það sé enn óleyst gáta af hverju sjór komst í snekkjuna.
