Eins árs drengur, Govinda að nafni, var nýlega bitinn af kóbraslöngu þar sem hann var að leik í bænum Bettiah á Indlandi. Slangan beit hann í handlegginn en það var það síðasta sem hún gerði í þessu lífi því Govinda beit hana á móti og svo illa að hún drapst.

„Við sáum slönguna á handlegg barnsins, allir flýttu sér til hans en áður en fólk náði til hans, hafði hann bitið slönguna og drapst hún á staðnum,“ sagði amma drengsins í samtali við indverska fjölmiðla.

Eftir að drengurinn hafði bitið slönguna til bana, leið yfir hann. Hann var strax fluttur á heilsugæslustöð þar sem hann fékk viðeigandi aðstoð.

Saurabh Kumar, læknir, sagði í samtali við Times of India að það hafi orðið drengnum til bjargar að hann fékk viðeigandi meðferð mjög fljótt eftir að hann var bitinn.

Um 300 slöngutegundir lifa á Indlandi og þar af eru 60 baneitraðar og getur eitur þeirra orðið fólki að bana.

Frá 2000 til 2019 var um ein milljón manna bitin af slöngum í landinu, miðað við opinberar skrár.