Milljónir bandarískra kvenna hafa hlaðið Tea Dating Advice appinu niður en því er að sögn ætlað að finna þá karla sem teljast undirförlir, leyna því að þeir séu kvæntir og veita konum vernd gegn körlum á Internetinu.
Fólkið á bak við appið segir að tæplega ein milljón nýrra notenda hafi bæst við í síðustu viku og nú noti rúmlega fjórar milljónir kvenna appið.
Appið hefur verið gagnrýnt fyrir að beinast gegn körlum og fyrir gagnaleka þar sem ljósmyndum 13.000 notenda var lekið.
En hvað gerir þetta app og af hverju er það svo umdeilt?
Appið gerir notendum kleift að birta nafnlausar færslur um karlmenn sem þær eru að deita. Þetta á enn sem komið er aðeins við í Bandaríkjunum.
Á vefsíðu appsins segir að það hafi verið sett í loftið til að færa konum „verkfærin sem þær þurfa til að geta deitað örugglega“. Appið býður upp á gervigreind við að leita að ljósmyndum út frá öðrum ljósmyndum, er þetta ætlað til að leita að fölskum ljósmyndum í stefnumótaprófílum.
Appið býður einnig upp á leit að símanúmerum til að sjá ef karlar eru í raun kvæntir, það býður einnig upp á leit í sakaskrá og skrám yfir kynferðisbrotamenn.
Þessir möguleikar eru ekki bara bundnir við Tea því flestir þeirra eru aðgengilegir fyrir almenning. En í appinu er hægt að nota þá alla saman.
Tea stærir sig einnig af að vera „stærsti hópur bandarískra kvenna, þar sem notendur deila reynslu sinni, nafnlausum upplýsingum um stefnumót og veitir stuðning“.
Sean Cook stofnaði appið 2023 eftir að móðir hans hafði verið blekkt af körlum á netinu og hafði rætt við menn með sakaferil þegar hún notaði stefnumótaöpp og síður.
