Flugþjónn hjá British Airways, hinn rúmlega fertugi Haden Pentecost, var gripinn nakinn inn á salerni flugvélar, sem var á leið frá Kaliforníu til Lundúna. Hann reyndist vera undir áhrifum amfetamíns og metamfetamíns.

The Independent skýrir frá þessu og segir að Pentecost hafi verið órólegur, sveittur og hafi ruglað. Yfirmaður hans í fluginu tók eftir því í undirbúningi fyrir flugtak að Pentecost tók ekki þátt í undirbúningnum.

Hann byrjaði síðan að kvarta undan magaverkjum og sagðist þurfa að skipta um föt og læsti sig inni á salerni.

Þegar hann opnaði dyrnar, sáu vinnufélagar hans að hann var nakinn og þegar þeir bentu honum á þetta, skildi hann það ekki. Hann var færður í föt og látinn setjast í laust sæti og vera þar það sem eftir lifði ferðarinnar.

Pentecost mætti fyrir dóm í Uxbridge á Englandi í síðustu viku og játaði að hafa mætt til starfa í flugvélinni undir áhrifum fíkniefna.

British Airways hefur rekið hann úr starfi.

Dómur yfir honum verður kveðinn upp síðar.