Hjónin voru búsett í þorpinu Seasalter í Kent í suðausturhluta Englands ásamt tveimur sonum sínum, 18 og 13 ára.
Þegar Amy kom heim þennan dag var Ed hvergi sjáanlegur. Lyklarnir hans voru inni í húsinu, hann svaraði ekki í símann og bíllinn var heima. „Það var eins og einhver hefði rænt honum,“ segir hún í samtali við KentOnline.
Hún hafði samband við lögreglu um klukkan 20 þetta kvöld og kom lögreglan um fjórum tímum síðar og tók skýrslu. Leitað var að Ed daginn eftir og farið í gegnum öryggismyndavélar, en ekkert fannst sem gat varpað ljósi á hvarf hans.
Það var svo ekki fyrr en tveimur dögum eftir hvarf hans að Amy gerði óhugnanlega uppgötvun á bak við skúr í garðinum við heimili þeirra. Þar lá Ed látinn í blóði sínu.
„Ég fann hann eiginlega bara vegna þess að hundarnir okkar voru stöðugt að fara á bak við skúrinn. Þá rann það upp fyrir mér hvað hafði gerst,“ segir hún.
Þennan dag var almennur frídagur í Bretlandi og hafði Ed ákvað að nýta daginn til að hreinsa til í garðinum, klippa tré og slá grasið. Svo virðist vera sem hann hafi látist af slysförum því hann var með áverka eftir keðjusög á vinstri handleggnum.
Dánardómstjóri hefur nú úrskurðað að um slys hafi verið að ræða og ekkert bendi til þess að dauðsfallið hafi borið að með saknæmum hætti. Þá var talið útilokað að Ed hafi veitt sjálfum sér þá áverka sem leiddu til dauða hans þar sem hann átti sér enga sögu um þunglyndi eða sjálfskaða.
