Breski skurðlæknirinn Neil Hopper var fyrir fjórum árum kosinn „Hugrakkasti Bretinn“ er nú heldur betur í vanda. Hann er í gæsluvarðhaldi og verður það að minnsta kosti fram í lok ágúst þegar hann á að mæta fyrir dómara á nýjan leik.

Hann hefur verið ákærður fyrir að ljúga að tryggingafélagi sínu um að fótleggir hans hafi verið teknir af honum vegna blóðeitrunar. Þetta gerði hann til að fá greitt frá tryggingafélaginu. Hann er einnig ákærður fyrir að hvetja annan mann til að taka líkamshluta af annarri manneskju.

The Independent skýrir frá þessu og segir að Hopper, sem er 49 ára, hafi komið að aflimum mörg hundruð manns áður en fótleggir hans voru teknir af honum neðan við hné.

Eins og fyrr sagði er hann ákærður fyrir að ljúga að tryggingafélagi sínu og fyrir að hafa keypt myndbönd á vefsíðunni „The EunuchMaker“ þar sem aflimanir eru sýndar. Er hann sagður hafa hvatt Marius Gustavson, manninn á bak við vefsíðuna, til að fjarlægja líkamshluta annars manns.

Hopper var kjörinn „Hugrakkasti Bretinn“ árið 2020 eftir að hann sigraði í „Against All Odds“ keppninni fyrir hugrakka Breta. Það var BBC Breakfast sem stóð fyrir keppninni.

Eftir að fótleggirnir voru teknir af honum ákvað hann að eltast við draum sinn um að verða geimfari og sótti um hjá Evrópsku geimferðastofnuninni og komst á lista yfir fatlaða einstaklinga sem áttu kost á að fara út í geim. Nafn hans var síðar fjarlægt af þessum lista.