Norðmaðurinn John Frederiksen, sem er ríkasti maður Noregs, hefur sett húsið sitt í Lundúnum á sölu og ætlar að flytja til Sameinuðu Arabísku Furstadæmanna. Hann er fyrir með kýpverskan ríkisborgararétt.

Árum saman hefur hann gert allt sem í hans valdi stendur til að forðast Noreg og hefur búið í Lundúnum áratugum saman. Er það vegna hagstæðara skattaumhverfis þar en í Noregi.

E24 segir að auður hans sé metinn á sem svarar til rúmlega 2.000 milljarða íslenskra króna.

Húsið í Lundúnum er enginn fjallakofi, heldur 2.800 fermetra lúxuseign. Það eru tíu svefnherbergi í húsinu og því fylgir átta hektara lóð.

Charles McDowell, fasteignasali, sagði í samtali við E24 að hann viti að húsið sé til sölu þótt það hafi ekki verið auglýst opinberlega. Hann sagðist telja að auðmenn frá Hong Kong, Kína, Bandaríkjunum eða Miðausturlöndum komi helst til greina sem kaupendur.

Húsið er friðað en það var byggt snemma á átjándu öld.

The Times segir að Fredriksen hafi keypt húsið 2001 og hafi þá greitt 37 milljónir punda fyrir það. Hann er sagður vilja fá 250 milljónir punda fyrir það núna.

Nýjar skattareglur og hertar reglur um erfðafjárskatt gera að verkum að Fredriksen hyggst flytja til Miðausturlanda en þar dvelur hann mikið nú orðið.

„Þetta minnir mig sífellt meira á Noreg. Bretland er farið til helvítis. Hinn vestræni heimur er á niðurleið,“ sagði hann í samtali við E24 í júní.

Hann hefur ekki búið í Noregi síðan 1978.