Bandaríska utanríkisráðuneytið tilkynnti í vikunni að 20 milljónir dollara hefðu verið lagðar til höfuðs þeim, eða tíu milljónir dollara á haus.
Iván og Jesus eru 41 og 39 ára gamlir og eru þeir synir mexíkóska eiturlyfjabarónsins Joaquín „El Chapo“ Guzmán sem var leiðtogi Sinaloa-glæpagengisins. Hann var framseldur til Bandaríkjanna árið 2017 og dæmdur í lífstíðarfangelsi árið 2019. Afplánar hann dóm sinn í Colorado.
Iván og Jesus eru í dag sagðir vera leiðtogar Sinaloa-klíkunnar sem er ein sú fyrirferðarmesta í heimi þegar kemur að smygli á fíkniefnum. Talið er að báðir bræðurnir séu búsettir í Mexíkó en ekki liggur fyrir hvar þeir dvelja.
Tammy Bruce, talskona utanríkisráðuneytis Bandaríkjanna, sagði við fjölmiðla á mánudag að yfirvöld væru að eltast við bræðurna vegna átaks til að sporna við útbreiðslu á fentanýli.
Tveir aðrir synir El Chapo, Joaquin Guzman Lopez og Ovidio Guzman Lopez, eru í fangelsi í Bandaríkjunum vegna fíkniefnasmygls, en talið er að þessir fjórir synir El Chapo hafi verið leiðtogar Los Chapitos, ofbeldisfullrar fylkingar innan Sinaloa-klíkunnar sem smyglað hefur miklu magni af fentanýli til Bandaríkjanna.
Í samtali við CBS News segir David Saucedo, öryggissérfræðingur í Mexíkó, að fjárhagsleg umbun hafi gefist Bandaríkjamönnum vel í baráttunni gegn glæpagengjum. Hvatinn fyrir einstaklinga innan glæpasamtakanna til að svíkja yfirmenn sína og fá vitnavernd sé mikill þegar um er að ræða stórar upphæðir eins og í þessu tilviki.
