Hinn heimsþekkta Greta Thunberg ræddi við fjölmiðla í París fyrr í dag eftir að hún kom þangað frá Ísrael en hélt svo í kjölfarið heim til Svíþjóðar. Var hún tekin höndum ásamt öðrum aðgerðasinnum af ísraelska hernum en hópurinn var á skútu á leið til Gaza með hjálpargögn. Segir Thunberg að hópnum hafi verið rænt, ráðist hafi verið á þau með ólögmætum hætti og hún harðneitar því að hafa skrifað undir nokkuð til þess að vera sleppt úr haldi.
Í sænskum fjölmiðlum er meðal annars haft eftir Thunberg:
„Við urðum fyrir ólögmætri árás á alþjóðlegu hafsvæði. Okkur var rænt af Ísrael og flutt þangað gegn vilja okkar.“
Thunberg minntist á að henni og fleirum úr hópnum hafi verið vísað frá Ísrael en hluti hópsins sé þar enn og hún viti lítið um hver staðan sé þar sem hún hafi ekki haft aðgang að síma í marga daga. Thunberg segist hafa miklar áhyggjur af þeim úr hópnum sem enn eru í Ísrael.
Aðspurð við hvers lags aðstæður Ísraelsher hafi haldið henni sagði hún þær vera ekkert í samanburði við það sem Palestínumenn mættu þola. Hún fullyrðir að hún hafi ekki undirritað yfirlýsingu um að hún hafi komið ólöglega til Ísrael en fullyrt hefur verið að þau úr hópnum sem var sleppt og vísað úr landi hafi öll gert það þar sem skilyrði hafi verið sett um það svo viðkomandi fengju að fara.
Alls voru 12 manns í hópnum. Þrjú þeirra auk Thunberg hafa yfirgefið Ísrael en átta hafa mótmælt brottvísun sinni og munu því vera þar enn um sinn á meðan mál þeirra eru meðhöndluð í dómskerfinu.
Sænska utanríkisráðuneytið segir að starfsfólks sendiráðs landsins í Ísrael hafi fengið að hitta Thunberg á meðan hún var þar í haldi.
Ísraelsk yfirvöld hafa gert lítið úr siglingu hópsins til Gaza og segja leiðangurinn hafa snúist um að fá athygli og birta myndir á samfélagsmiðlum. Því neitar Thunberg og segir hópinn hafa vilja sýna samstöðu. Hún bendir á að siglingin hafi verið hluti af skipalest sem hafi siglt reglulega með hjálpargögn til Gaza frá 2008 og ætlunin sé að halda því áfram.
