Þetta þótti nokkuð sérstakt enda hafði Lester þessi verið dæmdur til dauða fyrir tilraun til nauðgunar og morð á 14 ára stúlku, Mary Ellen Deener, árið 1965. Dómnum var aftur á móti breytt í lífstíðarfangelsi árið 1972, aðeins þremur dögum áður en til stóð að taka hann af lífi.
Fangaverðir fluttu Lester og nokkra aðra fanga í verslunarmiðstöðina og skiluðu þeir sér allir til baka, nema Lester sem lét sig hverfa. Rúm 50 ár eru síðan og enn þann dag í dag er Lester ófundinn.
US Marshals hefur nú endurvakið umræðu um málið og birt nýja mynd af Lester eins og hann gæti litið út í dag, 81 árs að aldri. US Marshals, elsta alríkislöggæslustofnun Bandaríkjanna, tók við málinu árið 2016 og hefur stofnunin fengið fjölda ábendinga um hvar Lester er niðurkominn án þess þó að það hafi leitt til handtöku hans.
Áður en að morðinu kom hafði Lester í tvígang verið handtekinn vegna kynferðisbrota. Hann hitti Mary í þvottahúsi í bænum Mansfield og réðst á hana þegar hún yfirgaf það. Dró hann hana á bak við hús, reyndi að nauðga henni en hún streittist á móti. Dró Lester þá upp byssu og skaut hana tvisvar í kviðinn. Hann kom aftur á vettvang um 20 mínútum síðar og sá þá að Mary var á lífi. Tók hann þá upp múrstein og barði hana þar til hún lést.
Lögregla hefur í gegnum árin fengið ýmsar vísbendingar og jafnvel staðfestingar um hvar Lester hefur haldið sig. Hann flutti til Los Angeles árið 1975 og tók þá upp nafnið Victor Young. Kona sem hann bjó með hafði samband við lögreglu eftir að upp úr sambandi þeirra slitnaði. Þegar lögregla freistaði þess að handtaka hann var hann á bak og burt.
Það spurðist svo til hans í Alabama þar sem hann starfaði við ræstingar á heimili fyrir vandræðaunglinga. Lögregla ræddi við föður hans, Mose Eubanks, sem búsettur var í Ohio og viðurkenndi hann að þeir töluðust reglulega við í gegnum síma. Hann neitaði þó að gefa upp dvalarstað sonar síns. Hann er svo sagður hafa verið viðstaddur útfarir hjá ættingjum sínum árin 2003, 2010 og 2012 en virðist ávallt hafa verið skrefinu á undan lögreglu.
Fjallað hefur verið um mál hans víða, til dæmis í Netflix-þáttunum Unsolved Mysteries.
