Ferðalagið hófst í Cottesloe á vesturströnd Ástralíu þann 15. apríl síðastliðinn og lauk því á Bondi Beach á austurströndinni í gær. Alls tók þetta hann 35 daga og hljóp hann um eitt hundrað kílómetra á dag að jafnaði, eða sem nemur um tveimur og hálfu maraþoni.
Það er ekki ýkja langt síðan að Goodge, sem er 31 árs, hóf að stunda langhlaup af kappi. Hann fékk „hlaupabakteríuna“ eftir að móðir hans lést úr krabbameini árið 2018 og hafði hlaupið í ár það markmið að safna áheitum fyrir góðgerðasamtök meðal annars í Bretlandi og Ástralíu.
Talið er að William hafi sett heimsmet með hlaupi sínu en engum hefur tekist að hlaupa yfir Ástralíu endilanga á svo stuttum tíma. Fyrra metið og það sem enn er viðurkennt samkvæmt heimsmetabók Guinness var sett af Chris Turnbull árið 2023 þegar hann kláraði hlaupið á 39 dögum. Árið 2022 hljóp ástralski rafvirkinn Nedd Brockmann þessa leið á 47 dögum.
Í viðtali við BBC, skömmu eftir að hann lauk við hlaupið, sagði William að síðastliðinn mánuður hafi verið gríðarlega erfiður og krefjandi. „Þetta er það erfiðasta sem ég gert.“
William segir að hann hafi misst nokkrar táneglur á leið sinni og upplifað allskonar verki hér og þar. Þá segist hann hafa hugsað til móður sinnar og þess sem hún gekk í gegnum þegar hann var við það að bugast. „Mér leið eins og hún væri með mér þarna stóran hluta ferðarinnar.“
