Flestir hugsa ekki út í blóðrásina fyrr en eitthvað fer úrskeiðis. En blóðtappar geta myndast fyrirvaralaust og haft alvarlegar afleiðingar á borð við heilablóðfall, hjartaáfall eða lungnasegarek.

Geta blóðsins til að storkna skiptir sköpum þegar við meiðum okkur og fáum sár. En stundum myndast blóðtappar sem eru ónauðsynlegir. Þeir geta lokað fyrir blóðflæðið til mikilvægra líffæra og valdið alvarlegum heilbrigðisvandamálum.

Einkenni blóðtappa eru mismunandi eftir því hvar í líkamanum þeir myndast. Sum einkenni koma fljótt fram en önnur þróast hægt og rólega dögum og jafnvel vikum saman.

Þegar blóðtappar myndast í bláæðum myndast oft bólgur í húðinni, fólk finnur fyrir sársauka og húðin verður rauðleit og mislit. Svæðið getur verið heitt og sársaukinn versnar yfirleitt við hreyfingu.

Þegar blóðtappi myndast í slagæð getur húðin við svæðið orðið föl og köld og tilfinning í handlegg eða fæti hverfur smám saman. Sumir finna einnig fyrir stingjum, veikleika eða miklum verkjum. Blóðskorturinn getur drepið vefi.

Allir geta fengið blóðtappa en sumir eru í meiri hættu en aðrir. Líkurnar eru meiri hjá þeim sem glíma við sykursýki, of háan blóðþrýsting eða of mikla blóðfitu. Reykingar og kyrrseta auka einnig líkurnar. Konur, sem nota getnaðarvarnarpilluna eða eru barnshafandi, eru einnig í meiri hættu á að fá blóðtappa og það sama á við um eldra fólk og fólk sem hefur ekki getað hreyft sig lengi eftir að hafa gengist undir skurðaðgerð.