Á gervihnattarmyndum frá Suðurskautslandinu sést andlit stara á þá sem skoða myndirnar. Þetta er að minnsta kosti skoðun sumra sem hafa skoðað þessar myndir.

Þessu skýrði Redditnotandi frá nýlega og segir að á myndum, sem eru á Google Earth, sé hægt að sjá andlit á Suðurskautinu. Á mynd, sem var deilt á r/strangeearth síðunni, virðist sem andlit sé sýnilegt, það virðist vera með hálflokuð augu, nef og munn.

Sumir Redditnotendur voru ekki lengi að bregðast við þessu og sögðu andlitið líkjast Megatron sem er þekkt andlit úr Transformers heiminum.

Ef þú hefur áhuga á að skoða þetta sjálf(ur) þá eru hnitin 72°00’52″S 168°35’37″E.

Metro bendir á að þetta sé ekki í fyrsta sinn sem myndir frá Suðurskautinu veki athygli notenda Google Earth. Notendur hafa áður talið sig hafa fundið stórar dyr og aðrir telja að pýramídi, byggður af geimverum, sé hálf grafinn í snjó í heimsálfunni.

Hvað varðar fyrrgreint andlit, þá eru fréttir af því ekki alveg nýjar af nálinni, því ef vel er að gáð, þá var myndum af því deilt á Reddit 2019.

Áhugamaður um fljúgandi furðuhluti sagði að andlitið sé hugsanlega sönnun þess að geimverur hafi heimsótt jörðina og aðrir samsæriskenningasmiðir segja að þetta geti verið eitthvað sem fornt menningarsamfélag skildi eftir sig.