Alþjóðaheilbrigðismálastofnunin WHO hefur sagt orkudrykki vera „ógn við lýðheilsu“ og sérfræðingar segja að þeir hafi ekki bara áhrif á líkamann á fyrstu klukkustundunum eftir neyslu, heldur geti þeir haft áhrif í allt að 24 klukkustundir.
Að sögn National Institute of Health (NIH), þá tekur blóðið 99% af koffíninu upp á fyrstu 45 mínútunum eftir drykkju orkudrykks. Áhrifanna gætir strax eftir fimm mínútur.
Eftir 30 til 50 mínútur byrjar púlsinn að slá hraðar og blóðþrýstingurinn hækkar að sögn Cincinnati Children‘s Hospital Medical Center. Á sama tíma tekur lifrin meiri sykur til sín úr blóðrásinni en það veldur snöggu orkuskoti.
En eftir klukkustund kemur hið óhjákvæmilega sykurfall. Þegar líkaminn hefur notað þessa skyndilegu orku, þá fellur blóðsykurinn mikið og þreytan getur virst enn meiri en áður.
Til að koma í veg fyrir þetta ráðleggja sérfræðingar fólki að drekka orkudrykkinn ekki allan í einu. Þess í stað sé betra að drekka hann á löngum tíma.
Eftir fimm klukkustundir hefur líkaminn brotið um það bil helming koffínsins niður en það getur tekið allt að tvöfalt lengri tíma hjá konum sem nota getnaðarvarnarpillu að sögn American Academy of Sleep Medicine.
Ef fólk er með lítið koffínþol, þá geta svefntruflanir gert vart við sig því áhrifa koffínsins gætir enn.
Eftir 12 til 24 klukkustundir byrja fráhvarfseinkenni að gera vart við sig. Science Direct segir að daglín koffínneysla geti gert fólk háð því og það hafi í för með sér að líkaminn byrji að bregðast neikvætt við þegar koffínið hverfur úr líkamanum.
Algeng fráhvarfseinkenni eru meðal annars: höfuðverkur, þreyta, pirringur, kvíði, erfiðleikar við að einbeita sér og handskjálfti.
