Ballerínan fyrrverandi sem um ræðir er Luana Lopes Lara frá Brasilíu. Forbes-tímaritið hefur nú staðfest að hún er yngsta konan sem hefur á eigin spýtur byggt auð sinn og náð milljarði Bandaríkjadala. Tekur hún þar með titilinn af Lucy Guo hjá gervigreindarfyrirtækinu Scale AI, en Lucy tók titilinn sjálf af Swift í apríl.
Mail Online segir frá því að uppgangurinn byggi á fyrirtæki Lopes, Kalshi, sem hefur stækkað hratt á undanförnum misserum. Er fyrirtækið metið á ellefu milljarða dollara en sjálf á Luana 12 prósenta hlut í fyrirtækinu.
Í stuttu máli er Kalshi einskonar spámarkaður þar sem hægt er að veðja og spá fyrir um ákveðna atburði, allt frá kosningum til íþróttaviðburða og viðskipta – og allt þar á milli.
Luana æfði ballett árum saman og stundaði nám við hinn virta Bolshoi-ballettskóla í Joinville í suðurhluta Brasilíu. Námið var ekkert grín og segir hún að kennari hafi í eitt skiptið haldið logandi sígarettu undir lærinu á henni til að prófa þol hennar.
Hún starfaði sem atvinnudansari í Austurríki um tíma en hætti og lagði ballettskóna á hilluna til að mennta sig frekar. Lærði hún tölvunarfræði við hinn virta MIT-háskóla í Massachusetts áður en hún stofnaði Kalshi ásamt skólafélaga sínum, Tarek Mansour, sem varð einnig milljarðamæringur 29 ára.
Luana rifjar upp að þau hafi tekið mikla áhættu þegar þau stofnuðu fyrirtækið.
„Við fórum beint úr námi og í tvö ár vorum við ekki með neina vöru í höndum. Ef við hefðum ekki fengið samþykki eftirlitsaðila hefðum við einfaldlega orðið gjaldþrota,” segir hún.
Hjólin fóru að snúast fyrir alvöru í fyrra þegar Kalshi vann mál sem CFTC, bandarísk eftirlitsstofnun með afleiðuviðskiptum, höfðaði gegn fyrirtækinu, en stofnunin vildi banna Kalshi að starfrækja veðmálamarkað vegna bandarísku forsetakosninganna.
Síðan þá hafa umsvif fyrirtækisins aukist og er veltan yfir einn milljarður dollara í hverri einustu viku.
