Nú þegar jólahátíðin er að líða undir lok og nýja árið er hafið fer lífið að komast aftur í fastar skorður með vinnu og skóla. En það getur verið smá áskorun að detta aftur inn í rútínu og það hefur stundum neikvæð áhrif á andlegu hliðina.

Læknir einn, Bing að nafni, deildi nokkrum ráðum í myndbandi á samfélagsmiðlinum TikTok um hvernig sé hægt að undirbúa heilann undir að við byrjum aftur að vinna og hvernig er hægt að skerpa einbeitinguna þegar við snúum aftur til vinnu.

Hann bendir á að engin töfrapilla sé til sem vinni gegn hnignandi heilastarfsemi og það sé heldur engin ein matartegund til sem tryggi að heilinn starfi á fullum afköstum alla ævi. Rannsóknir sýni hins vegar að ákveðnar fæðutegundir geti gert heilanum mjög gott.

Hann mælir með að fólk borði káltegundir á borð við grænkál, spínat og brokkolí. Þær eru fullar af næringarefnum á borð við B-vítamín, fólín, B-12 vítamín og E-vítamín en þessi efni geta hamlað andlegri hrörnun.

Hann segir fólki að hugsa um þessar fæðutegundir sem eldsneyti fyrir heilafrumurnar.

Því næst nefnir hann feitan fisk á borð við lax, sardínur og þorsk til sögunnar. Þessar tegundir innihalda mikið af ómega 3 fitusýrum  sem hafa verið tengdar við minna magn af beta-amyloid prótíni í heilanum en það myndar hættulega klumpa í heila Alzheimerssjúklinga.

Hann ráðleggur fólki að borða feitan fisk tvisvar í viku en ef fólki finnst hann ekki góður sé hægt að borða valhnetur eða hörfræ í staðinn.

Hann mælir einnig með neyslu jarðarberja, brómberja og bláberja en þau eru stútfull af flavónóíðum sem eru ein öflugustu andoxunarefnin og vel til þess fallin að bæta minnið. Þau vinna einnig gegn bólgum og geta dregið úr hættunni á krabbameini og styrkt ónæmiskerfið að hans sögn.

Fyrir þá sem elska te og kaffi þá eru góðu fréttirnar þær að Dr. Bing segir að koffín geti bætt einbeitinguna og hjálpað heilanum að geyma nýjar minningar. Það verði þó að gæta þess að ofnota ekki koffín og forðast neyslu þess síðdegis því það geti haft neikvæð áhrif á svefninn.