Ryan Borgwardt, 45 ára Bandaríkjamaður, sviðsetti eigin dauða í fyrra og yfirgaf eiginkonu sína og þrjú börn. Þetta gerði hann þar sem hann hafði kynnst annarri konu í Evrópuríkinu Georgíu og ætlaði sér að hefja nýtt líf með henni.

DV fjallaði meðal annars um málið í fyrra.

Í gær féll dómur yfir Ryan en hann var dæmdur í 89 daga fangelsi fyrir að hindra störf lögreglu. Dómurinn jafngildir fjölda þeirra daga sem honum tókst að villa um fyrir yfirvöldum.

Það var þann 12. ágúst í fyrra að Ryan, sem búsettur er í Wisconsin, skilaði sér ekki heim úr kajakferð á vatnið Green Lake. Báturinn hans fannst mannlaus á vatninu og benti flest til þess að eitthvað hafi gerst sem varð til þess að hann drukknaði. Bíllinn hans fannst einnig á sínum stað, á bílastæði, við vatnið.

Umfangsmikil leit að líki hans skilaði engum árangri og heima sátu eiginkona og þrjú börn, sem allt í einu voru orðin föðurlaus, í sárum. Lögreglu grunaði þó fljótt að maðkur væri í mysunni og komst á sporið í október í fyrra þegar tölvan hans var tekin til rannsóknar.

Við yfirferð á henni kom ýmislegt í ljós, til dæmis að hann hafði átt í samskiptum við ónefnda konu í fjarlægu landi, opnað nýjan bankareikning og aflað sér upplýsinga um hvernig best væri að flytja fé úr landi. Þá hafði hann tilkynnt um týnt vegabréf og fengið nýtt afhent skömmu áður en hann hvarf. Gamla vegabréfið hans var heima.

Ryan játaði sök fyrir dómi en auk þess að sæta 89 daga fangelsi var honum gert að greiða 30 þúsund dollara í sekt, sem er um það bil kostnaður yfirvalda við að leita að honum.

„Ég iðrast gjörða minna og þess sársauka sem ég hef valdið fjölskyldu og vinum,“ sagði Borgwardt fyrir dómi áður en refsingin var ákveðin.

Saksóknarar kröfðust 45 daga fangelsisvistar, en Mark Slate, dómari í Green Lake-sýslu, ákvað að lengja dóminn í 89 daga. „Hann villti um fyrir lögreglu í alls 89 daga,“ sagði dómarinn og lagði áherslu á að refsingin gæti haft fælingarmátt fyrir þá sem kynnu að íhuga að sviðsetja eigið andlát líkt og Ryan gerði.

Í ákæru kom fram að hann hefði hvolft kajaknum viljandi og komið sér í land á uppblásnum gúmmíbát sem hann hafði meðferðis. Hann hjólaði svo 110 kílómetra á rafhjóli til borgarinnar Madison, tók rútu þaðan til Toronto, flaug til Parísar og þaðan áfram til Georgíu í Kákasus.

Í nóvember 2024 tókst yfirvöldum loks að ná sambandi við Ryan og sannfæra hann um að snúa aftur til Bandaríkjanna í desember. Hann gaf sig fram og var ákærður fyrir að hindra leitina. Eiginkona hans, sem hann hafði verið giftur í 22 ár, skildi við hann fjórum mánuðum síðar.