Hún flúði erfiðar heimilisaðstæður og endaði í faðmi sem hún taldi að myndi verða vendipunktur í lífi hennar. En þetta fang tilheyrði Ghislaine Maxwell og úr varð ný barátta fyrir Virginia, barátta sem kostaði hana að lokum lífið.
Hún er ein umtalaðasta manneskjan í sögunni um barnaníðinginn Jeffrey Epstein.
Nú heldur barátta hennar áfram, að henni látinni, þegar endurminningar hennar koma út í október. Bókin snýst að miklu leyti um líf hennar sem kynlífsþræll Epstein.
Erfið æska
Virginia fæddist í Kaliforníu 1983 og flutti til Flórída með fjölskyldu sinni þegar hún var fjögurra ára.
Í fjölda viðtala lýsti hún erfiðri æsku og kynferðislegri misnotkun sem hún varð fyrir 11 ára gömul af hendi fjölskylduvinar. Hún byrjaði að reykja hass 12 ára og fór að skrópa úr skóla. 13 ára bjó hún hjá nokkrum fósturfjölskyldum og endaði á götunni 14 ára.
Á unglingsárunum komst hún aftur í samband við föður sinn, sem starfaði hjá Donald Trump í Mar-a-Lago í Flórída. Virginia fékk vinnu þar og dreymdi um að verða nuddari.
Dag einn hafði kona ein samband við hana og bauð henni í atvinnuviðtal vegna starfs sem nuddari hjá auðugum kaupsýslumanni.
Þessi kona heitir Ghislaine Maxwell.
Virginia sagðist hafa haldið að hún væri að fara í atvinnuviðtal en þess í stað hafi hún hitt Jeffrey Epstein, sem lá nakinn, og hafi Maxwell sagt henni hvernig hún ætti að nudda hann.
„Þau virtust vera ágætt fólk svo ég treysti þeim og sagði þeim að líf mitt hefði verið mjög erfitt fram að þessu, að ég hefði verið á flótta, að ég hefði verið misnotuð kynferðislega, misnotuð líkamlega. Þetta var það versta sem ég gat sagt þeim, því með þessu vissu þau hversu viðkvæm ég var,“ sagði hún í samtali við BBC.
Þarna hófst nýr kafli í lífi hennar, tími þar sem hún var kynlífsþrætt Epstein sem seldi einnig aðgang að líkama hennar.
„Þetta byrjaði með einum og síðan urðu þeir tveir og koll af kolli. Áður en ég vissi af var ég lánuð til stjórnmálamanna, háskólamanna og konungborinna,“ sagði hún í viðtali við Miami Herald.
Hún gerði sátt við Epstein 2009 og greiddi hann henni 500.000 dollara í bætur.
Epstein var síðar ákærður fyrir mansal og kynferðislegt ofbeldi gagnvart fjölda barnungra stúlkna. Hann svipti sig lífi í fangelsi 2019 þegar hann beið þess að réttarhöldin hæfust. Maxwell var dæmd í 20 ára fangelsi fyrir sinn þátt í málinu.
Andrés prins
Virginia barðist fyrir réttlæti sér til handa og fyrir önnur fórnarlömb í Epstein-málinu. Hún kom margoft fram í fjölmiðlum og var ósjaldan umfjöllunarefni þeirra.
Ekki síst þegar hún skýrði frá því að hún hefði ítrekað verið neydd til kynlífs með Andrési Bretaprins þegar hún var aðeins 17 ára. Andrés er bróðir Karls konungs.
Andrés hefur alltaf neitað þessu en 2022 gerði hann sátt við Virginia vegna málsins. Í kjölfarið var hann sviptur heiðursorðum sínum frá hernum og neyddur til að láta af störfum sem verndari hinna ýmsu samtaka.
Virginia tók eigið líf þann 25. apríl síðastliðinn. Í yfirlýsingu frá ættingjum hennar kom fram að hún hafi verið „öflugur hermaður í baráttunni gegn kynferðislegri misnotkun“ og að „afleiðingar misnotkunarinnar hafi að lokum orðið óbærilegar“. Hún varð 41 árs.
Hún lést í Ástralíu þar sem hún bjó síðustu æviárin með eiginmanni sínum og þremur börnum.
Áður en hún lést lauk hún við að skrifa endurminningar sínar í samvinnu við rithöfundinn og blaðamanninn Amy Wallace. Bókin heitir „Nobody‘s Girl: A Memoir of Surviving Abuse and Fighting for Justice“ og kemur út 21. október.
Ef einstaklingar glíma við sjálfsvígshugsanir er bent á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
