Vísindamaðurinn, Roozbeh Vadi, starfaði í kjarnorkustöð í landinu og var hann dæmdur fyrir að veita upplýsingar sem gerðu Mossad, leyniþjónustu Ísraels, kleift að myrða annan íranskan kjarnorkuvísindamann í júnímánuði í snörpum átökum við Ísrael og Bandaríkin.
Héldu saksóknarar því fram að Mossad-liðar hafi komist í kynni við Vadi í gegnum netið, hitt hann í Austurríki og greitt honum í rafmynt í skiptum fyrir háleynilegar upplýsingar.
ABC News greinir frá þessu og segir að leyniþjónustuaðgerðir Ísraelsmanna í sumar hafi náð djúpt inn í íranskt valdakerfi og orðið til þess að 40 hátt settir embættismenn voru drepnir á 12 daga tímabili í júní.
Aftaka vísindamannsins er sögð undirstrika alvarleika brotsins og áhyggjur íranskra yfirvalda af njósnum innan eigin raða.
Í frétt ABC kemur fram að eftir átökin í júní hafi írönsk stjórnvöld handtekið hundruð einstaklinga sem grunaðir eru um njósnir eða að ógna öryggi ríkisins.
Mannréttindasamtök hafa varað við því að ofsóknirnar beinist jafnvel að andófsfólki ekki síður en raunverulegum njósnurum. Íran segist hafa handtekið 20 manns tengda Ísrael og tekið af lífi 10 þeirra, þar á meðal Vadi, fyrir njósnir síðan stríðinu lauk. Mál Vadi var aðeins gert opinbert eftir að hann var hengdur á dögunum.
