Saksóknari í máli gegn Catherine Hoggle, konu í Maryland-fylki í Bandaríkjunum, sem er ákærð fyrir að hafa myrt tvö börn sín sem hurfu árið 2014, segir að Catherine hafi grínast á hópþerapíufundi með að kyrkja börnin sín. Þetta hafi hún gert með handahreyfingum. Samkvæmt saksóknaranum átti þerapían sér stað rétt eftir að Catherine hafði í raun myrt börn sín.
Daily Mail greinir frá. Catherine var handtekin síðastliðinn föstudag og ákærð fyrir að hafa árið 2014 myrt þriggja ára dóttur sína, Söru, og tveggja ára son sinn Jacob.
Catherine hefur strítt við geðræn vandamál um árabil en hún var handtekin og ákærð rétt eftir að hún var útskrifuð af geðsjúkrahúsi.
Saksóknari í Montgomery sýslu í Maryland segir að eiginmaður hafi verið með Catherine á umræddum hópþerapíufundi og hafi fundurinn átt sér stað nokkrum klukkustundum eftir dauða barnanna. Hafi Catherine sýnt kyrkingartak með höndum sínum og síðan sagt að hún væri að grínast. Saksóknarinn mælti gegn því að Catherine yrði látin laus gegn tryggingu á grundvelli þess að hún ætti þriðja barnið sem hún gæti mögulega unnið mein ef hún gengi laus.
Samkvæmt upplýsingum frá lögreglu sást Catherine síðast með son sinn Jacob þann 7. september en þá ók hún burtu með hann frá heimili þeirra. Þegar hún kom aftur heim sagðist hún hafa skilið Jacob eftir í gistingu hjá vinafólki. Lögregla segir að hún hafi síðan farið með Söru af heimilinu síðar um kvöldið.
Börnin hafa aldrei sést síðan. Lögregla telur að þau hafi verið myrt, líklega kyrkt, og lík þeirra skilin eftir í ruslagámi.
Catherine er sögð hafa ætlað að nema eldri bróður barnanna á brott (hann var þá fimm ára) þar sem hann beið eftir skólabíl, en faðir drengsins hafi gripið þar inn í og komið í veg fyrir það.
Hún var síðan ákærð fyrir morð árið 2017 en dómari úrskurðaði að hún væri ekki fær um að gangast undir réttarhöld sökum geðræns ástands síns og að hún ætti að gangast undir geðmeðferð.
Núna hefur hins vegar ný ákæra verið gefin út og Catherine Hoggle bíður réttarhalda.
