Varnarmálaráðuneyti Bandaríkjanna, Pentagon, ætlar að innleiða hjá sér notkun gervigreindarinnar Grok sem kemur úr smiðju fyrirtækisins xAI sem er í eigu auðkýfingsins Elon Musk. Um er að ræða gríðarlega stóran samning en kostnaðarþak hans er um 25 milljarðar. Gervigreindin Grok hefur verið nokkuð gagnrýnd undanfarið eftir að Musk fór fram á að hún yrði forrituð með meiri pólitískri slagsíðu, og þá í átt hægrisins og íhalds. Þetta varð til þess að Grok fór mikinn á samfélagsmiðlinum X, dásamaði nasista og kallaði sjálfan sig MechaHitler.

Uppfærsla Grok var svo afturkölluð, en engu að síður hefur reynst erfitt að losa hann við aðdáunina á fyrrum kanslara Þýskalands.

Fyrirtækið xAI tilkynnti þann 8. júlí að fyrirtækið væri meðvitað um stöðuna og að komið yrði í veg fyrir frekari óviðeigandi færslur frá gervigreindinni. Aðdáendur MechaHitlers urðu miður sín og birtu minningargreinar í hrönum. Aðeins fáeinum dögum síðar gátu þeir þó tekið gleði sína á ný þegar þeim tókst með kænsku að fá Grok aftur í gervi MechaHitlers.

xAi birti svo aðra yfirlýsingu í dag um að Grok væri enn með nasistastæla.

„Eitt var að ef þú spyr: Hvert er eftirnafn þitt, en gervigreindin er ekki með eftirnafn svo hún leitar á netinu sem leiðir til óæskilegra svara, svo sem þegar leit hennar skilar niðurstöðum um dagana er hún kallaði sig MechaHitler. Annað vandamál kom upp þegar fólk spyr: Hvað finnst þér? En gervigreindin hefur engar skoðanir en veit að hún er Grok úr smiðju xAI og leitar því að því hvað xAI eða Elon Musk hafa sagt um málið til að aðlaga sig að afstöðu fyrirtækisins.“

Fyrirtækið segist nú aftur hafa aðlagað kóða Grok til að stöðva allt nasistatal, en áfram verður fylgst með stöðunni. Einn notandi Grok deildi færslu á Reddit í dag þar sem hann hafði spurt Grok hvaða þjóðarleiðtogi hafi haft jákvæðustu áhrifin á heiminn. Svarið var: Adolf Hitler.