Yfirvöld í Flórída tóku í gærkvöldi af lífi hinn 54 ára Anthony Wainwright. Aftakan hófst klukkan 18:10 að staðartíma í gærkvöldi og var Anthony úrskurðaður látinn 12 mínútum síðar.

Hann var dæmdur til dauða fyrir morð og nauðgun á 23 ára móður tveggja ungra barna, Carmen Gayheart, í apríl 1994. Samverkamaður hans, Richard Hamilton, hlaut sama dóm en hann lést af náttúrulegum orsökum í fangelsi í janúar 2023.

Carmen var nemi í hjúkrunarfræði þegar hún var numin á brott fyrir utan verslun í Lake City.

Aðeins tveimur dögum áður höfðu Anthony og Richard flúið úr fangelsi í Norður-Karólínu þar sem þeir afplánuðu þunga dóma, Anthony 10 ára fangelsi fyrir innbrot en Hamilton 25 ára fangelsi fyrir vopnað rán. Daginn eftir flóttann stálu þeir bíl og brutust inn í hús þar sem þeir stálu meðal annars skotvopnum.

Þeir komu að Carmen fyrir utan verslun í Lake City þar sem hún var að raða innkaupapokum inn í bílinn. Stálu þeir bifreið Carmen og fóru með hana á afvikinn stað þar sem þeir nauðguðu henni. Að því loknu kyrktu þeir hana og skutu í höfuðið.

Lögreglumaður kom auga á þá daginn eftir og þegar hann hugðist handtaka kom til skotbardaga á milli þeirra. Það fór ekki betur en svo að Richard var skotinn í andlitið og Anthony í líkamann en báðir náðu þeir sér að fullu. Þar sem þeir voru á bifreið Carmen reyndist auðvelt fyrir lögreglu að tengja þá við glæpinn.