Flestir hafa eflaust heyrt, eða reynt á eigin skinni, að það sé ekki gott að drekka kaffi skömmu áður en gengið er til náða því það örvi mann svo mikið og geti þannig komið í veg fyrir að maður sofni. En það er annar drykkur sem er enn verri að þessu leyti samkvæmt niðurstöðum nýrrar rannsóknar.

Daily Star skýrir frá þessu og segir að niðurstöður nýrrar rannsóknar sýni að mjólkurdrykkja sé allt annað en góð áður en gengið er til náða. Þetta er eflaust þvert á það sem margir halda enda oft talað um að gott sé að fá sér mjólkurglas eða flóaða mjólk til að bæta nætursvefninn.

En í rannsókninni kom í ljós að þegar þátttakendurnir drukku mjólk fyrir svefninn þá sváfu þeir aðeins í sex klukkustundir og 52 mínútur, eða tæplega klukkustund skemur en venjulega.

Þátttakendurnir drukku ýmsa drykki og voru þeim gefin stig byggð á ýmsum þáttum, til dæmis hversu lengi þátttakendurnir sváfu, REM svefni, léttum svefni og djúpum svefni.

Þegar þátttakendurnir drukku kaffi, sváfu þeir í sjö klukkustundir og 10 mínútur og meðal andvökutíminn yfir nóttina var 54 mínútur. En hins vegar náðu þeir aðeins 63 mínútna djúpsvefni og var það stysti djúpsvefnstíminn sem náðist.

Te kom best út en tedrykkja tryggði 74 mínútna djúpsvefn þrátt fyrir að te innihaldi koffín. Að mati þátttakenda þá voru svefngæðin 80/100 eftir tedrykkju.

Heitt súkkulaði er annar drykkur sem kom vel út fyrir nætursvefninn en það var í öðru sæti. Þátttakendurnir sváfu í sjö klukkustundir og 48 mínútur eftir að hafa drukkið heitt súkkulaði.