Flutningur forfeðra okkar frá Evrasíu gæti hafa haft áhrif á líkurnar á þróun ýmissa sjúkdóma hjá nútíma Evrópubúum. Þetta eru sjúkdómar á borð við MS, sykursýki 2 og Alzheimers.

Þetta eru niðurstöður nýrra rannsókna sem voru birtar í byrjun janúar í vísindaritinu Nature. Í rannsóknunum var DNA úr beinum og tönnum mörg hundruð forfeðra okkar rannsakað. Elstu beinin voru frá Miðsteinöld. Erfðaefnið var borið saman við erfðaefni nútíma Evrópubúa.

Rannsóknin varpar ljósi á hvaða erfðafræðilegu áhrif þrír straumar innflytjenda til Evrópu höfðu. Þetta var koma veiðimanna og safnara fyrir um 45.000 árum, koma bænda frá Miðausturlöndum fyrir um 11.000 árum og koma fjár- og nautgripabænda frá Austur-Evrópu og Asíu fyrir um 5.000 árum.

Í heildina var erfðamengi 1.750 forfeðra okkar borið saman við erfðamengi um 410.000 nútímamanna sem allir eru hvítir og breskir.

Borin voru kennsl á stökkbreyt DNA sem veldur MS-sjúkdómnum en það kom með bændum frá Austur-Evrópu og Asíu, sem settust aðallega að í Norður-Evrópu, fyrir um 5.000 árum. Þetta gæti skýrt af hverju sjúkdómurinn er algengastur hjá fólki af norður-evrópskum uppruna.

Einnig kom í ljós að fólk, sem er með meira af DNA frá veiðimönnum og söfnurum, á hugsanlega frekar á hættu að þróa með sér sykursýki 2 og Alzheimers en þeir sem eru með minna af þessu DNA.