Plánetan heitir Gliese 12b og er hitinn á henni um 42 gráður en það þýðir að þar getur líf hugsanlega þrifist. Sky News segir að plánetan sé meðal fárra, sem vitað er um, þar sem fólk gæti fræðilega séð lifað.
Larissa Palethorpe, hjá Edinborgarháskóla, sagði í samtali við Sky News að það yrði óþægilegt fyrir fólk að búa á plánetunni en þegar rætt sé um „búsetuhæfa“ plánetu sé miðað við að fljótandi vatn sé á yfirborðinu og það geti verið svo í þessu tilfelli.
Palethorpe og samstarfsfólk hennar um allan heim, notaði A Transiting Exoplanet Survey gervihnött NASA til að finna plánetuna. Það tók innan við ár að reikna út stærð hennar, hitastigið á henni og hreyfingar hennar.
Palethorpe sagði að það sér virkilega erfitt að finna litlar plánetur en vísindamenn vilji vita meira plánetur, á stærð við jörðina, til öðlast skilning á hversu margar slíkar plánetur eru hugsanlega í alheiminum. Það að hafa fundið eina svona nærri jörðinni sé mjög spennandi, því það veiti vísindamönnum tækifæri til að gera rannsóknir á lofthjúpnum og læra þannig meira um hana.
Það er þó ekki hægt að skella sér í helgarferð til Gliese 12b þótt hún sé ekki svo fjarri jörðinni á mælikvarða alheimsins. Hún er í 40 ljósára fjarlægð sem þýðir að ef við sendum hraðskreiðasta geimfar okkar af stað þangað, þá kemst það á áfangastað eftir 300.000 ár.
