Það kemur fyrir á bestu bæjum að fólk glími við hægðatregðu. Hjá sumum gerist þetta örsjaldan en hjá öðrum er þetta eitthvað sem gerist öðru hverju. Margir vita ekki hvað þeir eiga til bragðs að taka og gera kannski ekki neitt eða kaupa sér hægðalosandi efni.

En það þarf ekki endilega að nota sérstakt hægðalosandi efni því það er að sögn hægt að koma hægðunum í lag með því að borða ákveðinn mat áður en farið er í háttinn að kvöldi til. Á kerfið þá að vera komið í lag næsta morgun.

Eftir því sem EatingWell segir þá er hægðatregða eitthvað sem leggst á marga. Til dæmis glíma 16% fullorðinna Bandaríkjamanna við hægðatregðu. Ef aðeins er horft til aldurshópsins yfir sextugu, þá er hlutfallið 33%.

Ef þú lendir oft í því að fá hægðatregðu, þá getur ástæðuna verið að finna í mataræði þínu. Það hvernig þú borðar getur haft áhrif á meltinguna.

Isabel Vasquez, næringarfræðingur, segir að algengasta orsök hægðatregðu sé skortur á trefjum. „Trefjaríkt fæði hjálpar til við að bæta massa og vatni við hægðirnar og það hjálpar matnum að komast hraðar í gegnum kerfið,“ sagði hún að sögn New York Post.

Hún sagði að kjúklingabaunir séu góður matur til að koma hægðunum í lag. Þær innihalda mikið af trefjum og það er auðvelt að tilreiða þær á einfaldan hátt. Til dæmis er hægt að opna dós, krydda baunirnar og skella í ofninn. Ef þær eru eldaðar á réttan hátt, eru þær ekki aðeins bragðgóðar, heldur einnig fullar af næringarefnum og þarmavinalegum efnum.