Árið 1923 lést danski auðmaðurinn Lars Emils Bruun. Óvenjuleg erfðaskrá hans gerði að verkum að afkomendur hans eru núna fyrst að fá aðgang að auðæfum hans og þau eru nú ansi mikil.

Bruun lést 21. nóvember 1923. Í erfðaskrá hans var kveðið á um að glæsilegt myntsafn hans skyldi vera í umsjón danska seðlabankans næstu 100 ári. Átti það að vera einhverskonar trygging fyrir mynt- og orðusafn landsins. Það er að segja, ef því yrði stolið eða myndi eyðileggjast þá átti safnið hans að koma í staðinn.

Í þessi 100 ár hafa áhugasamir getað skoðað safnið hans í seðlabankanum en í nóvember á síðasta ári voru þessi 100 ár liðin og því var komið að lokum vörslutíma seðlabankans á safninu.

Bloomberg segir að nú verði safnið boðið upp í Bandaríkjunum. Áætlað verðmæti þess er sem svarar til um 10 milljarða íslenskra króna en það er upphæðin sem safnið er tryggt fyrir.

Það er uppboðshúsið Stack´s Bowers, sem sérhæfir sig í sölu sjaldgæfra mynta, sem sér um uppboðið. Safnið verður selt í mörgum hlutum og verður fyrsti hlutinn boðinn upp í haust.

Talsmenn uppboðshússins segja safnið „verðmætasta myntsafnið sem nokkru sinni hefur komið á markaðinn“.

Bruun safnaði meðal annars mynt frá víkingatímanum á Bretlandseyjum og hann skráði Danmerkursöguna með mynt frá tíundu, elleftu og tólftu öld svo eitthvað sé nefnt.