Þegar lögreglan brást við tilkynningu um heimilisófrið í íbúð einni í frönsku borginni Niece á síðasta ári mætti ótrúleg sjón lögreglumönnunum. Í íbúðinni, sem er 80 fermetrar, bjó par með 159 ketti og 7 hunda.
Dýrin þjáðust af vökvaskorti og voru vannærð. Flest voru þau þakin sníkjudýrum og bjuggu þarna innan um hrúgur af saur og þvagi út um allt. Heppnu dýrin lifðu þetta af en þau óheppnum voru dauð þegar lögreglan kom á vettvang. Meðal annars fundu lögreglumenn tvo dauða ketti og tvo dauða hvolpa inni á baðherberginu. Fljótlega eftir að lögreglan kom á vettvang drápust sex kettir til viðbótar að sögn franskra fjölmiðla.
Í síðustu var parið, sem eru 68 ára kona og 52 ára karl, dæmd í eins árs skilorðsbundið fangelsi fyrir dýraníð. Þeim var einnig bannað að eiga dýr um ókomna framtíð. Þess utan þurfa þau að greiða dýraverndunarsamtökum, sem sjá nú um dýrin, sem svarar til 22 milljóna íslenskra króna.
Eftir dómsuppkvaðninguna lýsti konan því yfir að hún hafi ekki í hyggju að gefast upp og muni hugsanlega áfrýja dómnum. „Þetta er eins og að segja konu að hún megi ekki eignast fleiri börn,“ sagði hún.
Fyrir dómi sagði hún að dýrin væru hin stóra ástríða í lífi hennar en viðurkenndi að hafa misst tök á ástandinu.
Niðurstaða geðrannsóknar á konunni leiddi í ljós að hún þjáist af svokölluðu Noah-heilkenni en það hefur í för með sér að fólk fær óstjórnlega þörf fyrir að bjarga dýrum, óháð því hvort það ráði við það.
2018 tók konan við 3 köttum og 3 hundum frá foreldrum sínum. Síðan tók hún um 30 ketti til viðbótar að sér en þá fann hún í yfirgefinni byggingu. Það segir sig sjálft að dýrin voru ekki geld og því fjölgaði þeim hratt.
