Farsæll gríndáleiðari hefur verið dæmdur í átta mánaða fangelsi fyrir að stela persónulegum myndum af konum á netinu og selja þær áfram á netinu.

Hinn breski Robert Temple hefur átt góðu gengi að fagna undanfarið og hefur sýning hans, Red Raw, notið mikilla vinsælda. Heitið er tilvísun í eldrautt hár skemmtikraftsins sem er hans helsta einkenni.

Temple vakti talsverða athygli í Bretlandi þegar hann náði því í gegn að fjörtíu ára gömlu banni um skemmtanir, þar sem dáleiðsla kemur við sögu, var aflétt.

Uppselt var á sýningu sem fara átti fram síðastliðið föstudagskvöld en gestir fengu þá meldingu um að sýningunni hafði verið aflýst af „óviðráðanlegum orsökum.“ Raunveruleg ástæða var hins vegar sú að Temple hafði verið dæmdur til áðurnefndar fangelsisvistar.

Tvær konur höfðu kært skemmtikraftinn fyrir að hafa brotist inn á reikninga þeirra á samfélagsmiðlum og stolið þaðan viðkvæmum myndum sem voru ekki ætlaðar til birtingar. Temple hafi síðan selt myndirnar á netinu fyrir rafmyntir.

Dáleiðarinn þekkti fórnarlömb sín ekki persónulega en átti sameiginlega vini á samfélagsmiðlum. Grunur leikur á að fórnarlömb hans séu mun fleiri samkvæmt umfjöllun breskra miðla.