Þegar Kristel Candelario, 32 ára, sem býr í Ohio í Bandaríkjunum, fór í frí til Detroit og Púertó Ríkó í júní á síðasta ári skildi hún 16 mánaða dóttur sína eina eftir í leikgrind heima hjá sér. Dóttirin, Jailyn, var látin þegar Candelario kom heim aftur.

Sky News segir að Candelario hafi játað að hafa orðið dóttur sinni að bana og að hafa stefnt heilsu hennar í hættu. Hún gerði samning við saksóknara um að játa þetta í stað þess að saksóknari féll frá tveimur ákæruatriðum um morð og líkamsárás.

Dómur verður kveðinn upp yfir Candelario í næsta mánuði og á hún ævilangt fangelsi yfir höfði sér.

Saksóknari segir að Candelario hafi skilið Jailyn eftir á heimili þeirra í Cleveland þegar hún fór í frí. Þegar hún kom heim tíu dögum síðar andaði Jailyn ekki og hringdi Candelario þá í neyðarnúmerið 911.

Jailyn var úrskurðuð látin eftir að viðbragðsaðilar komu á vettvang. Krufning leiddi í ljós að hún hafði dáið úr hungri og alvarlegum vökvaskorti