Ástarmál Karina hafa vakið upp ramakvein víða í Asíu og ekki vegna þess hvers eðlis sambandið er, heldur vegna þess eins að hún á í ástarsambandi.
Hið rétta nafn Karina er Yu Ji-min. Hún er einn af meðlimum K-poppgrúppunnar Aespa. Nýlega var skýrt frá því að hún eigi kærasta. Hann er suðurkóreskur leikari og heitir Lee Jae-wook.
Í eyrum margra hljómar þetta eflaust eins og góð frétt af ástarmálum Karina. En í sumu hlutum Asíu, sérstaklega Suður-Kóreu og Japan, er þetta nánast glæpsamlegt að mati aðdáenda Karina.
Margir aðdáendur hennar hafa brugðist ókvæða við, er brugðið og eru öskureiðir, að sögn CNN. Nokkrir hneykslaðir aðdáendur óku vöruflutningabíl, með rafrænu auglýsingaskilti á, fyrir framan höfuðstöðvar umboðsfyrirtækis Karina. Á skiltinu stóð meðal annars: „Af hverju svíkur þú aðdáendur þína? og „Biðstu strax afsökunar, annars munu plöturnar þínar ekki seljast eins vel og það verða auð sæti á tónleikum.“
Ramakvein aðdáendanna varð til þess að Karina sendi frá sér afsökunarbeiðni í handskrifuðu bréfi sem hún birt á Instagram en þar er hún með 12,7 milljónir fylgjenda.
„Ég veit vel hversu miklum vonbrigðum aðdáendur mínir, sem hafa stutt mig, hafa orðið fyrir og hversu óhamingjusöm þið eruð við að hugsa um sameiginlegar minningar okkar. Ég vil gera líf særðra aðdáenda minna betra héðan í frá. Ég hef alltaf verið hreinskilin við ykkur og hvert og eitt ykkar skiptir mig enn mjög miklu máli,“ skrifaði hún í bréfinu sem The Times lét þýða.
En það voru ekki allir aðdáendur sem tóku afsökunarbeiðninni vel. „Ef hún elskaði aðdáendur sína, þá hefði hún ekki orðið ástfangin til að byrja með,“ skrifaði einn á kínverska samfélagsmiðlinum Weibo.
