The Guardian skýrir frá þessu. Geimförin eru raunar á vegum NASA. Þau eru hluti af hinu svokallað CLPS-verkefni en einkafyrirtæki taka þátt í verkefninu.
Martin Elvis, sem starfar hjá Center for Astrophysics, sem er samvinnuverkefni Harvard háskóla og Smithsonian, sagði að það þurfi að grípa til aðgerða núna því þær ákvarðanir sem verða teknar núna muni slá tóninn fyrir hvernig við munum hegða okkur á tunglinu í framtíðinni.
Hann er ekki einn um að hafa áhyggjur af rányrkju á tunglinu og að hún geti skaðað vinnu stjörnufræðinga í framtíðinni. Richard Green, prófessor í stjörnufræði við Arizona háskóla, hefur einnig áhyggjur af geimferðum einkafyrirtækja.
„Við erum ekki að reyna að koma í veg fyrir að bækistöðvum verði komið upp á tunglinu. En það eru nokkrir spennandi staðir þarna uppi sem eru mjög verðmætir fyrir vísindin. Við verðum að fara mjög varlega í hvar við byggjum bækistöðvar og námur,“ sagði hann.
Einn af þessum stöðum er bakhliðin en þangað ná útvarpsbylgjur frá jörðinni ekki. Bakhliðin er því upplagður staður til að koma útvarpssjónauka upp til að hlusta eftir útvarpsbylgjum frá alheiminum á unga aldri. Sumir vonast til að það geti varpað ljósi á hvernig fyrstu vetrarbrautirnar urðu til.
En þetta verður kannski ekki svo auðvelt því NASA og fleiri geimferðastofnanir hafa í hyggju að umkringja tunglið með gervihnöttum svo auðveldara verði að stjórna vélmennum á yfirborði tunglsins. Þetta fer illa saman við að vera með útvarpssjónauka sem kemur að mestu gagni í umhverfi þar sem er eins lítið af útvarpsbylgjum og hægt er.
