Blaðamannafundi Bandarísku strandgæslunnar vegna leitar að kafbátnum Titan sem saknað hafði verið eftir skoðunarferð að flaki Titanic í Norður-Atlantshafi er nú lokið.
Í fréttum BBC kemur fram að rannsókn á braki sem fannst við leitina hafi leitt í ljós að það sé úr Titan sem hafi fallið saman í iðrum hafsins. Talið er nánast öruggt að allir 5 mennirnir sem voru um borð séu látnir.
Talið er að slysið hafi átt sér stað um 500 metra frá flaki Titanic. Strandgæslan gat ekki staðfest að hún gæti fundið lík farþega og áhafnar Titan þar sem um afar erfitt umhverfi, á miklu dýpi, væri að ræða.
Hljóð sem heyrðist fyrr í vikunni, á leitarsvæðinu, og var talið mögulega stafa frá farþegum og áhöfn Titan sem væru að reyna að gera vart við sig með því að lemja í skrokk bátsins er nú ekki talið tengjast bátnum á nokkurn hátt.
Áfram verður haldið að rannsaka svæðið þar sem brakið fannst en formlegri leit að Titan verður hætt.
