Efnahagskreppa herjar á landið og margra vikna verkföll gera stöðuna ekki betri. Heilbrigðiskerfið er að niðurlotum komið og ekki bætir úr skák að Rishi Sunak, forsætisráðherra, glímir við fjölda vandamála innan Íhaldsflokksins þar sem hvert hneykslismálið á fætur öðru ríður yfir.
Reiknað er með að verkföll haldi áfram nú í febrúar því kröfum stéttarfélaganna um umtalsverðar launahækkanir hefur ekki verið mætt af ríkinu. Þrátt fyrir að verkföllin valdi öngþveiti í landinu þá styður meirihluta landsmanna þau samkvæmt niðurstöðum skoðanakannana.
Mikill þrýstingur er á ríkisstjórnina en Sunak hefur tekið harða afstöðu varðandi kjaramálin og haldið sig við hana. Hann veit auðvitað að ef stéttir á borð við hjúkrunarfræðinga og lestarstjóra fá miklar launahækkanir þá er hætta á að breskt efnahagslíf sigli í strand.
Verðbólgan mældist 11,1% í október og sló þar með 41 árs gamalt met. Þessi mikla verðbólga gerir að verkum að margar fjölskyldur eiga í erfiðleikum með að láta enda ná saman. Kirkjur víða um land eru orðnar að matarbönkum þar sem fólk getur fengið matargjafir til að þurfa ekki að velja á milli að kynda hús sín eða borða.
BBC hefur birt fjölda mataruppskrifta á netinu með máltíðum sem kosta undir einu pundi. Mörg sveitarfélög hafa opnað hitastofur þar sem fólk getur komið til að ylja sér.
Hjálparsamtök segja að mörg börn í landi, sem er meðal ríkustu landa heims, fari svöng í háttinn og að aðalmáltíð þeirra sé það sem þau fá í hádeginu í skólamötuneytinu.
Í könnun sem YouGov gerði fyrir hugveituna Resolution Foundation sögðust 11% aðspurðra fara svangir í háttinn því þeir eigi ekki fyrir mat. Áður en heimsfaraldur kórónuveirunnar skall á var hlutfallið 5%.
