„Við eigum að rækta nýja menningu varðandi hjónabandið og það að eignast börn.“ Þetta sagði Xi Jinping, forseti Kína, í ræðu á kínversku kvennaráðstefnunni nýlega.

The New York Times skýrir frá þessu og segir að forsetinn hafi sagt að það sé á ábyrgð kommúnistaflokksins að hafa áhrif á viðhorf ungra kvenna til „ástarinnar, hjónabandsins, frjósemi og fjölskyldu“. Markmið ungra kvenna eigi að vera að giftast og eignast börn.

Hann hvatti konur, sem eru í leiðtogastöðum, til að „segja góðar sögur um fjölskylduhefðir“ og til að „leiðbeina konum um að viðhalda hefðbundnum kínverskum gildum“.

Ástæðan fyrir orðum forsetans er sá lýðfræðilegi vandi sem steðjar að landinu. Fæðingartíðnin hefur lækkað mjög mikið og landsmönnum fer nú fækkandi. Kínverjar eru ekki lengur fjölmennasta þjóð heims, Indverjar hafa tekið við þeirri stöðu.

Ástæður þessa lýðfræðilega vanda má rekja til einsbarnsstefnu kommúnistaflokksins frá 1980 til 2015. Þess utan er dýrt að mennta sig í Kína og því velja margir að sleppa því að eignast börn eða draga það á langinn.

Reynt hefur verið að hvetja til barneigna með því að veita fólki skattaafslátt, lengja fæðingarorlof og greiða húsnæðisstyrki. Nýjasta skrefið er sem sagt að reyna að hafa áhrif á viðhorf kvenna til fjölskyldulífsins.

Margir hafa gagnrýnt orð forsetans og segja margir bandarískir háskólakennarar að þau séu merki um „afturför“ og geti verið merki um að kínverskar konur missi aftur sjálfræði sitt og verði ekkert annað en verkfæri kínverska ríkisins.

Fubing Su, prófessor í stjórnmálafræði við Vassar háskólann, sagðist óttast að kínversk stjórnvöld refsi konum sem vilja ekki eignast börn. „Ef kínverska ríkisstjórnin gat fórnað líkama og réttindum kvenna á meðan eittbarnsstefnan var við lýði, þá getur hún alveg eins tekið upp á því að þvinga þær aftur,“ sagði Fubing Su í samtali við The New York Times.