Rússneska utanríkisráðuneytið sakar 37 vesturlönd um að brjóta gegn alþjóðasáttmála. Um er að ræða svonefndan Chicago-sáttmála sem er samþykkt um alþjóðaflugmál. Samningur þessi var undirritaður í Chigaco í Bandaríkjunum árið 1944. Um er að ræða einn fyrsta alþjóðlega samninginn sem Ísland átti aðild að.
Rússland telur ljóst að brotið hafi verið gegn þessum sáttmála og hefur farið fram á alþjóðaflugmálastofnunin, ICAO, bregðist við með virkum og hlutlausum hætti. Meint brot á að felast í því að vesturlönd hafi lokað lofthelgi sinni fyrir umferð frá Rússlandi. 37 lönd hafi tekið þátt í þessu broti, 27 aðildarríki Evrópusambandsins, Bandaríkin, Kanada, Bretland, Ísland, Noregur, Sviss, Albanía, Norður-Makedónía, Svartfjallaland og Mónakó.
Rússneska utanríkisráðuneytið hefur lagt fram formlega kvörtun þar sem segir að þessi ríki hafi tekið ólögmæta einhliða ákvörðun um að loka lofthelgi sinni og þar með gerst sek um fordómafullar þvingunaraðgerðir gegn rússneska ríkinu og flugfélögum þess. Meðal annars hafi þessi ríki lokað lofthelgi fyrir rússneskum flugförum, bannað flutninga á flugförum og varahlutum þeirra til Rússlands, sagt upp samningum um viðhaldsþjónustu á rússneskum flugförum og tryggingum þeirra, lagt hald á flugför sem voru utan rússneskrar lögsögu og takmarkað aðgengi að mikilvægum veðurfarsupplýsingum sem nauðsynleg eru fyrir flug.
Með þessu hafi brotlegu ríkin stefnt flugöryggi í hættu og stórskaðað traust milli ríkjanna. Rússland hafi verið meðal leiðandi ríkja á sviðum flugferða og ætli ríkið ekki að sitja aðgerðarlaust á meðan hagsmunir þeirra eru skaðaðir með þessum hætti. Ætlast Rússland til að ICAO muni bregðast við þessum aðstæðum en hér sé um að ræða fordæmalausa lítilsvirðingu við skuldbindingar ríkjanna á alþjóðavettvangi.
Rétt er að minnast þess að í kjölfar innrásar Rússlands í Úkraínu var Rússlandi vísað úr ICAO, en það átti sér stað í október á síðasta ári. Rússland krafðist þess að aftur yrði kosið um aðild þeirra en með vísan til fordæmalausra aðstæðna var erindi þeirra hafnað.
