Tollverðir á flugvöllum eiga það til að sjá ótrúlegustu hluti í farangri farþega.

Tollverðir á flugvellinum í Minnesota í Bandaríkjunum gætu þó þurft að bíða lengi eftir að sjá eitthvað viðlíka og þeir sáu í farangri konu einnar á dögunum.

Konan var að koma heim til Bandaríkjanna frá Kenía þann 29. september síðastliðinn þegar hún gaf sig á tal við tollverði og útskýrði að fyrra bragði hvað hún var með í töskunni.

Í farangrinum var búið að pakka inn nokkrum brúnum kúlum og viðurkenndi konan að um væri að ræða skít úr gíraffa.

Konan útskýrði að hún væri skartgripahönnuður og ætlaði sér einmitt að búa til hálsmen úr úrganginum. Það hefði hún gert áður með góðum árangri, til dæmis hefði hún búið til skartgripi úr því sem elgir skila frá sér.

Tollverðir lögðu hald á skítinn og var honum fargað, að því er fram kemur í frétt CBS News. Engir eftirmálar verða af atvikinu þar sem konan reyndi ekki að smygla skítnum inn í landið. Skipti höfuðmáli að hún hafi framvísað hinum óvenjulega farangri við komuna til landsins.

Tekið er fram í frétt ABC News að gjörningur konunnar hefði getað haft alvarlegar heilsufarslegar afleiðingar í för með sér, bæði fyrir hana og þann sem myndi ganga með hálsmenið á sér. Úrgangur úr villtum dýrum geti borið með sér hættulegar veirur sem valdið geta alvarlegum veikindum.