Franska lögreglan leitar af miklum krafti að Emile, tveggja ára dreng, sem hefur verið saknað síðan á laugardaginn. Hann var hjá afa sínum og ömmu í Frönsku Ölpunum þegar hann ráfaði út úr garði þeirra á meðan þau voru að gera sig klár til að yfirgefa heimilið. Síðan hefur ekkert spurst til hans.

Sky News segir að lögreglan hafi ekki hugmynd um hvað hafi orðið af Emile. Hann sást síðast á gangi nærri húsi afa síns og ömmu. Tveir aðilar sáu hann þar.

Afinn og amman búa í afskekktu fjallaþorpi þar sem aðeins búa tveir tugir manna.

Lögreglan hefur leitað í öllum húsum í þorpinu og um 500 sjálfboðaliðar hafa komið að leitinni. Leitað hefur verið í skóglendi og ökrum nærri þorpinu.

Remy Avona, saksóknari á svæðinu, sagði að „svæðinu hafi verið lokað og utanaðkomandi bannaður aðgangur“.

Hann sagði að leitað hafi verið á 12 hekturum lands og sérhæfður búnaður hafi verið notaður við leitina. Hún beinist aðallega að þorpinu og næsta nágrenni.

Leitað hefur verið í 30 húsum, 25 hafa verið yfirheyrðir, 12 bílar hafa verið teknir til rannsóknar auk leitarinnar á fyrrgreindum 12 hekturum.